Adimen artifiziala - Retail

Webgunea eta web-orri mugikorrak ahalik eta hobekien diseinatzeko aukera ematen du, hasierako orritik ordainketa egiteko orrira ahalik eta lotura gehien egiteko moduan. Datuei esker, jakin dezakegu zenbateko probabilitatea dagoen hurrengo orrira pasatzeko, zer aldaketa egin behar ditugun nabigazioa hobetzeko, eta nola hobetu ditzakegun bezeroaren gogobetetze-maila eta erabiltzaile-esperientzia. Horretaz gain, datuei esker, erosketa-orgatik salmenta gutxiago galtzea lor daiteke, bezeroaren erosketen historian oinarrituta produktu-gomendio pertsonalizatuak egin daitezke, eta edukia ahalik eta ondoen kokatzeko aldaketak ere egin daitezke.

Datu historikoek eta inguruko datuek artikulu edo erreferentzia bakoitzaren etorkizuneko eskaera zehazten lagundu diezazukete, eta zure ERPan edo salmentak eta eragiketak planifikatzeko zure sistemetan integratzen. Hala, artikulu bakoitzaren eskaera zehaztu eta zein dendatan saldu behar duzun erabaki ahal izango duzu, eta, horri esker, produktuen eskuragarritasuna hobetuko duzu, eta gehiegizko izakinak murriztu.

Kate handi guztiek jakin nahi izaten dute zenbat produktu itzuliko zaizkien, gutxiago erosteko eta kostuak murrizteko. Adimen artifizialeko soluzio baten bidez, erosketa egiteko erabilitako kanalaren arabera produktua itzultzeko aukera zenbatekoa den aurreikus dezakete enpresek. Horretarako, bezeroei, erosketa-saskiari eta produktuari buruzko datuak erabiltzen dituzte, eta, hala, izakinen kudeaketari buruzko erabaki hobeak har ditzakete.

Prezioaren, sustapenen eta eskariaren arteko erlazioa ikuspegi historikotik ulertzea lortzen bada, aurreikus daiteke zer sustapen-estrategia beharko diren, eta, hala, aurreikusitako diru-sarrerak eta bolumenak lortu ahal izango dira. Horrela, hautatutako artikuluen sustapen-estrategiak optimiza daitezke, azken prezioa publizitate-taldeekin koordinatu, eta hainbat prezio-estrategia probatu.

Datu historikoei esker,dendak irekitzeko, handitzeko edo ixteko kokaleku onenak identifika daitezke, lehendik dauden establezimenduak irentsi gabe. Halaber, iragar daiteke zenbateko espazioa behar den, dendak zenbateraino gainjarriko zaizkion bata besteari, eta produktu-aukera, demografia eta lehia nolakoak izango diren.

Etapa desberdinetan dauden bezeroei zuzendutako kanpainak sortzeak lagundu egiten du etorkizuneko marketin-komunikazioen estrategia elikatzen, eta, hala, bezeroen kanal, produktu eta maiztasun gogokoenen araberako komunikazioak sortzen dira. Hartara, konfiantza berreskura daiteke bezeroak atxikitzeko estrategia proaktiboen bidez, eta transakzioen kopurua eta batez besteko tamaina handitu marketin garrantzitsu batekin, eta kanpainetako ROIa maximizatu.

Inkesten edo bezeroek emandako iritzien bidez jakin daiteke bezero batek zure produktuak gomendatuko dituen edo ez, hark bezero gisa izan duen esperientziaren datuak oinarri hartuta. Hartara, zure aurkakoak parte-hartzaile neutral bihur daitezke, eta neutralak, berriz, aldeko.

Negozio txiki bat eraginkortasunez zuzentzeko, beharrezkoa da langile-kopuru optimoa kalkulatzea, produktuak une egokian merkaturatzeko. Zenbait faktore erabiliz (hala nola espazioa, produktu-aukera edo modeloak hornitzeko batez besteko epea), zenbat langile behar dituzun hobeto kalkulatu ahal izango duzu, eta eraginkortasun operatiboa bezeroen beharrekin lerrokatu. Langileak lanik gabe edukitzearen kostua gutxitzeaz gain, eskari handiko uneak zein izango diren aurreikusi ahal izango duzu, eta langile-kopurua horren arabera egokitu.